اسلام آباد (نیوز ڈیسک) — انسدادِ دہشتگردی کی عدالت اسلام آباد نے 9 مئی کو تھانہ رمنا پر حملے کے مقدمے کا فیصلہ سنا دیا، جس کے تحت پاکستان تحریک انصاف کے رکن قومی اسمبلی عبداللطیف، سابق ایم پی اے وزیر زادہ کیلاشی اور دیگر 9 افراد کو مجموعی طور پر 15 سال 4 ماہ قید اور مختلف مالی جرمانوں کی سزا سنائی گئی ہے۔
جیو نیوز کے مطابق، عدالت کے جج طاہر عباس سپرا نے تفصیلی فیصلہ جاری کیا، جس میں ملزمان پر تھانے پر حملہ، پولیس پر فائرنگ، موٹر سائیکلوں کو نذر آتش کرنے اور دیگر پرتشدد کارروائیوں کے الزامات ثابت قرار دیے گئے۔
فیصلے کے مطابق، چار ملزمان محمد اکرم، میرا خان، شاہ زیب اور سہیل خان کو عدالتی کارروائی کے بعد موقع پر ہی گرفتار کر لیا گیا، جبکہ غیر حاضر ملزمان کے خلاف گرفتاری کے وارنٹ جاری کر دیے گئے ہیں۔
استغاثہ کی جانب سے 24 گواہوں کے بیانات قلمبند کیے گئے جبکہ شناخت پریڈ بھی مجسٹریٹ کے سامنے کرائی گئی۔ عدالت نے ہر جرم کے تحت علیحدہ علیحدہ سزائیں سنائیں، جن کی تفصیل درج ذیل ہے:
-
پولیس پر قاتلانہ حملے پر 5 سال قید اور 50 ہزار روپے جرمانہ
-
موٹر سائیکلوں کو جلانے پر 4 سال قید اور 40 ہزار روپے جرمانہ
-
پولیس کارروائی میں مداخلت پر 3 ماہ قید
-
دفعہ 144 کی خلاف ورزی پر 1 ماہ قید
-
غیر قانونی مجمع اکٹھا کرنے پر 2 سال قید
-
دہشتگردی کے الزامات کے تحت 10 سال قید اور 2 لاکھ روپے جرمانہ
جج طاہر عباس سپرا نے فیصلے میں کہا کہ اگر دارالحکومت میں تھانوں پر حملے معمول بن جائیں تو ریاستی رٹ اور امن و امان کو شدید خطرہ لاحق ہو سکتا ہے۔ عدالت نے واقعے کو ریاستی اداروں پر حملہ قرار دیا جو کسی صورت برداشت نہیں کیا جا سکتا۔