گرپتونت سنگھ پنوں کا دوٹوک اعلان: "بھارت نے اگر پاکستان پر حملہ کیا تو یہ مودی کی آخری جنگ ہوگی"
اسلام آباد (نیوز ڈیسک) — خالصتان تحریک کے سرکردہ رہنما گرپتونت سنگھ پنوں نے اپنے تازہ بیان میں بھارت کو سخت وارننگ دیتے ہوئے کہا ہے کہ اگر نریندر مودی کی حکومت نے پاکستان پر حملے کی جرات کی تو یہ بھارت اور اس کے وزیر اعظم کی آخری جنگ ثابت ہو سکتی ہے۔
پنوں نے واضح کیا کہ بھارتی پنجاب دہلی کے تسلط سے جلد آزادی حاصل کرے گا اور خالصتان کے نام سے ایک نیا ملک دنیا کے نقشے پر ابھرے گا۔ انہوں نے کہا کہ بھارتی پنجاب پاکستان کا قریبی اتحادی ہے اور ہر حال میں اس کے ساتھ کھڑا ہے۔
خالصتان ریفرنڈم کے حوالے سے پنوں نے پاکستان سے مطالبہ کیا کہ وہ اقوام متحدہ میں سکھ قوم کے حق خود ارادیت کی حمایت میں آواز بلند کرے، تاکہ سکھوں کو آزادی کا حق مل سکے۔
پنوں نے اپنے بیان میں اعلان کیا کہ اگر بھارت نے پاکستان پر حملہ کیا تو خالصتانی سکھ بھارتی پنجاب میں پاکستانی فوج کے لیے لنگر لگائیں گے اور بھارتی فوج کے خلاف مزاحمت کریں گے۔ ان کا کہنا تھا کہ پنجاب کی فوجی چھاؤنیوں کی دیواروں پر چاکنگ بھی دیکھی گئی ہے، جس میں سکھوں سے اپیل کی گئی ہے کہ وہ بھارت کے مفاد میں پاکستان سے جنگ نہ کریں۔
یاد رہے کہ اس سے قبل بھی گرپتونت سنگھ پنوں نے ایک ویڈیو پیغام میں دعویٰ کیا تھا کہ بھارت میں بسنے والے تقریباً دو کروڑ سکھ پاکستان کے ساتھ ہیں اور وہ اپنی سرزمین کو بھارتی افواج کی جارحیت کا راستہ نہیں بننے دیں گے۔