فیصل واوڈا کا تہلکہ خیز انکشاف: "فیض حمید کو کم از کم 14 سال قید کی سزا ہو گی، اسٹیبلشمنٹ کبھی پی ٹی آئی سے بات نہیں کرے گی"
اسلام آباد (این این آئی) – سینیٹر فیصل واوڈا نے ایک نجی ٹی وی پروگرام میں گفتگو کرتے ہوئے کہا ہے کہ سابق لیفٹیننٹ جنرل فیض حمید کو کم از کم 14 سال قید کی سزا مل سکتی ہے۔ انہوں نے کہا کہ "جو شخص اپنے قریبی لوگوں کو نہیں بچا رہا، وہ دوسروں کو کیسے چھوڑے گا؟ بادشاہوں کے دل بڑے اور جیلوں کے کمرے چھوٹے ہوتے ہیں۔"
فیصل واوڈا کا کہنا تھا کہ طنزیہ گفتگو سے بانی رہنما کی تکالیف میں مزید اضافہ ہوگا۔ انہوں نے واضح کیا کہ اسٹیبلشمنٹ نہ تو پی ٹی آئی سے بات کرے گی اور نہ ہی آئندہ ایسا کوئی امکان موجود ہے۔
انہوں نے موجودہ سیاسی صورتحال پر تبصرہ کرتے ہوئے کہا کہ اب تو سیاست میں کوئی باقی نہیں بچا، صرف ایک شخصیت قیادت کر رہی ہے۔ واوڈا کے مطابق، "فیلڈ مارشل" جیسے قائد کی وجہ سے ملک کو وہ فوائد حاصل ہو رہے ہیں جن کا برسوں سے انتظار تھا، اور پوری قوم ان کے ساتھ کھڑی ہے۔
فیصل واوڈا نے وزیراعظم شہباز شریف کو بھی سراہا، یہ کہہ کر کہ وہ بغیر پہیے کے جہاز چلا رہے ہیں، جس میں وہ خود اور پوری قوم سوار ہے، اور اس سے ملک کو فائدہ ہو رہا ہے۔ ان کے مطابق، اس کا کریڈٹ وزیراعظم کو دیا جانا چاہیے۔
انہوں نے "فیلڈ مارشل" کی ایمانداری اور قابلیت کو خراج تحسین پیش کرتے ہوئے کہا کہ وہ کسی دباؤ میں نہیں آتے اور ملکی مفادات کے ہر محاذ پر سرگرم عمل ہیں، چاہے وہ آئی ایم ایف سے مذاکرات ہوں، سیاسی معاملات ہوں یا سکیورٹی سے متعلق چیلنجز۔
پی ٹی آئی سے متعلق گفتگو کرتے ہوئے واوڈا نے کہا کہ اب نہ پارٹی کو سوال اٹھانا چاہیے اور نہ ہی اسٹیبلشمنٹ یا حکومت سے بات کرنے کی کوشش کرنی چاہیے۔ ان کا کہنا تھا کہ موجودہ حکومت کی کمزوریاں پیچھے رہ گئی ہیں کیونکہ ان کے دور میں کامیابیاں حاصل ہو رہی ہیں۔
علیمہ خان کے بیان پر طنزیہ تبصرہ کرتے ہوئے انہوں نے کہا: "بادشاہت تو ہے، بادشاہوں کے دل بڑے اور جیلوں کے کمرے چھوٹے ہوتے ہیں۔"
فیصل واوڈا نے یہ بھی کہا کہ اگر ان کے بچوں کو نقصان پہنچا تو بھارت کے وزیراعظم نریندر مودی کا سر مانگا جائے گا، اور اگر بھارت نے پانی روکا تو پاکستان کی جانب سے سخت ردعمل آئے گا۔
انہوں نے اس بات پر بھی زور دیا کہ امریکا اور پاکستان کے درمیان تجارتی آپشنز کھل چکے ہیں، جن کے ثمرات جلد سامنے آئیں گے۔
آخر میں، انہوں نے کہا کہ وہ جس "جہاز" میں بیٹھے ہیں اس میں ن لیگ بھی شامل ہے، اور اب پی ٹی آئی بھی اسی میں شامل ہونے جا رہی ہے۔