حکومتِ پاکستان نے یومِ تکبیر کے موقع پر 28 مئی کو ملک بھر میں عام تعطیل کا اعلان کر دیا ہے۔

 

لاہور (نیوز ڈیسک) – پنجاب حکومت نے شدید گرمی کے پیش نظر صوبے بھر کے تعلیمی اداروں میں گرمیوں کی تعطیلات اور یومِ تکبیر (28 مئی) کے موقع پر عام تعطیل دینے کا فیصلہ کر لیا ہے۔

صوبائی وزیر تعلیم رانا سکندر حیات نے سوشل میڈیا پلیٹ فارم “ایکس” (سابقہ ٹوئٹر) پر جاری بیان میں اعلان کیا کہ 28 مئی سے اسکولوں میں موسم گرما کی تعطیلات کا آغاز ہو گا، جبکہ اسی روز یومِ تکبیر کی مناسبت سے عام تعطیل بھی دی جائے گی۔

مزید یہ کہ گرمی کی شدت کو مدنظر رکھتے ہوئے اسکولوں کے اوقات کار میں تبدیلی کی گئی ہے۔ 28 مئی تک تمام سرکاری اسکولوں میں مختصر دورانیے کی کلاسز ہوں گی، جو صبح 7:30 سے 11:30 بجے تک جاری رہیں گی۔

حکومت پنجاب کا کہنا ہے کہ یہ اقدامات طلبہ، اساتذہ اور تعلیمی عملے کی صحت و حفاظت کو یقینی بنانے کے لیے کیے گئے ہیں۔ تعطیلات کا باضابطہ نوٹیفکیشن جلد جاری کیا جائے گا۔