اسلام آباد (نیوز ڈیسک) – خیبرپختونخوا حکومت نے عید الاضحیٰ کے پیش نظر سرکاری ملازمین کو 30 مئی تک تنخواہیں اور پنشن ادا کرنے کا فیصلہ کیا ہے۔ نجی ٹی وی کے مطابق صوبائی حکومت نے ملازمین کی سہولت کے لیے عید سے قبل تنخواہوں کی ادائیگی کا حکم جاری کیا ہے، تاکہ وہ عید کی تیاری بہتر انداز میں کر سکیں۔
محکمہ خزانہ نے اس حوالے سے تمام سرکاری محکموں اور اداروں کو مراسلہ ارسال کر دیا ہے۔ یاد رہے کہ یکم جون بروز اتوار ہفتہ وار تعطیل ہے، اس لیے ماہِ مئی کی آخری ورکنگ ڈے پر ہی تنخواہیں ادا کی جائیں گی۔
دوسری جانب، بجٹ 2025-26 کی تیاری سے متعلق پاکستان اور آئی ایم ایف کے درمیان مذاکرات مکمل ہو چکے ہیں۔ وزارتِ خزانہ کے ذرائع کے مطابق حکومت نے تنخواہ دار طبقے اور صنعتوں پر ٹیکسوں کی شرح میں کمی، اور ترقیاتی و غیر ترقیاتی اخراجات میں کمی سے متعلق تجاویز بھی آئی ایم ایف سے شیئر کر دی ہیں۔