جاپانی نایاب آم "میازاکی" کی کراچی میں کامیاب کاشت، فی کلو قیمت تین لاکھ روپے تک پہنچ گئی
اسلام آباد (نیوز ڈیسک) — دنیا کے قیمتی ترین پھلوں میں شامل جاپانی نسل کا نایاب آم "میازاکی" اب پاکستان میں بھی کامیابی سے اگایا جا رہا ہے۔ اپنی بے مثال مٹھاس، خوشبو، اور منفرد سرخ و جامنی رنگت کی بدولت مشہور یہ آم عالمی مارکیٹ میں 800 سے 900 امریکی ڈالر فی کلو میں فروخت ہوتا ہے، جو پاکستانی کرنسی میں تقریباً ڈھائی سے تین لاکھ روپے بنتے ہیں۔
اس قیمتی پھل کو اس کی انفرادیت کی بنا پر "دھوپ کا انڈہ" یا "ڈائناسور کے انڈے" جیسے دلکش نام دیے گئے ہیں۔ میازاکی آم کا گودا ریشہ سے پاک، نرم، اور انتہائی ذائقے دار ہوتا ہے، جس کی خوشبو اور مٹھاس اسے دیگر اقسام سے ممتاز کرتی ہے۔
پاکستان میں یہ آم کراچی کے علاقے ملیر، خصوصاً میمن گوٹھ میں کاشت کیا جا رہا ہے۔ مقامی کسان غلام ہاشم نورانی نے جاپان سے میازاکی آم کا پودا منگوا کر مقامی ماحول میں اس کی نگہداشت کی۔ ان کے مطابق، کراچی کا گرم مرطوب موسم اس نایاب پھل کی افزائش کے لیے موزوں ثابت ہوا۔
یہ دوسرا سال ہے کہ غلام ہاشم نورانی کو اس آم کی فصل حاصل ہوئی ہے، اور اس سیزن میں وہ اسے تین لاکھ روپے فی کلو تک فروخت کرنے کا ارادہ رکھتے ہیں۔
ماہرین کا کہنا ہے کہ پاکستان میں میازاکی آم کی کامیاب کاشت صرف مقامی صارفین کے لیے نہیں بلکہ بین الاقوامی مارکیٹ میں برآمدات کے ذریعے زرمبادلہ کمانے کا ایک نیا موقع بھی فراہم کر سکتی ہے، جو ملکی معیشت کے لیے خوش آئند پیش رفت ہے۔