پریتی زنٹا کا مداح کے نامناسب سوال پر سخت ردعمل، خواتین سے امتیازی سلوک کی نشاندہی
اسلام آباد (نیوز ڈیسک) انڈین پریمیئر لیگ (آئی پی ایل) کی فرنچائز پنجاب کنگز کی شریک مالک اور معروف بالی ووڈ اداکارہ پریتی زنٹا اُس وقت برہم ہو گئیں جب ایک مداح نے سوشل میڈیا پر ان سے آسٹریلوی کرکٹر گلین میکسویل کے حوالے سے ایک غیر مناسب سوال پوچھا۔
پریتی زنٹا نے حال ہی میں سوشل میڈیا پر مداحوں کے ساتھ سوال و جواب کا سیشن رکھا، جس میں ایک صارف نے استفسار کیا: "کیا گلین میکسویل کی آپ سے شادی نہ ہونے کی وجہ سے وہ پنجاب کنگز کے لیے اچھی کارکردگی نہیں دکھا پاتے تھے؟"
اس سوال پر پریتی زنٹا نے سخت اور دوٹوک ردعمل دیتے ہوئے کہا، "کیا آپ یہی سوال کسی مرد فرنچائز مالک سے بھی کرتے؟ یا یہ امتیازی سلوک صرف خواتین تک محدود ہے؟ اگر میں کرکٹ کے شعبے میں کام نہ کرتی، تو شاید کبھی اندازہ نہ ہوتا کہ کارپوریٹ دنیا میں خواتین کو کتنی مشکلات درپیش ہیں۔"
انہوں نے مزید کہا، "مجھے یقین ہے کہ آپ نے یہ بات مذاق میں کہی، مگر یہاں سب جانتے ہیں کہ اس سوال کے پیچھے اصل نیت کیا تھی۔ میں گزشتہ 18 سال سے اس میدان میں مسلسل محنت کر رہی ہوں، اس لیے براہِ کرم مجھے وہ عزت دیجیے جس کی میں حق دار ہوں، اور خواتین کے بارے میں بے بنیاد قیاس آرائیاں بند کیجیے۔"
واضح رہے کہ پریتی زنٹا کی ٹیم پنجاب کنگز اس وقت آئی پی ایل پوائنٹس ٹیبل پر 11 میچز میں 7 فتوحات کے ساتھ 15 پوائنٹس حاصل کر کے تیسرے نمبر پر موجود ہے۔