فتح راکٹ سسٹم: پاکستان کی دفاعی طاقت کا منہ بولتا ثبوت
اسلام آباد (این این آئی) — پاکستان کا جدید ترین "فتح راکٹ سسٹم" دنیا بھر میں اپنی صلاحیتوں کا لوہا منوا چکا ہے اور دشمن کے دفاعی نظام کو تباہ کرنے کا ایک واضح پیغام بن کر سامنے آیا ہے۔ حالیہ معرکہ بنیان مرصوص میں پاکستانی افواج نے دشمن کو مؤثر اور منہ توڑ جواب دے کر قومی دفاع کی ایک نئی تاریخ رقم کی۔
اللہ کی نصرت سے کی گئی اس فیصلہ کن کارروائی میں پاک فضائیہ نے دشمن کے چھ جدید لڑاکا طیاروں کو نشانہ بنایا، جن میں بھارت کے تین رافیل طیارے بھی شامل تھے۔ یہ آپریشن نہ صرف دشمن کی جارحیت کا جواب تھا بلکہ پاکستان کی دفاعی قوت کا عملی مظاہرہ بھی تھا۔
رپورٹس کے مطابق اس معرکے میں زمین پر بھی دشمن کو کاری ضرب لگائی گئی، جہاں "فتح راکٹ سسٹم" نے کلیدی کردار ادا کیا۔ یہ سسٹم پاکستان میں مقامی طور پر تیار کردہ گائیڈڈ ملٹی لانچ راکٹ ٹیکنالوجی پر مبنی ہے، جو 140 سے 700 کلومیٹر کی رینج میں دشمن کے متعدد اہداف کو کامیابی سے نشانہ بنانے کی صلاحیت رکھتا ہے۔
فتح ون سسٹم بیک وقت 8 راکٹس فائر کر کے 8 مختلف اہداف کو ہدف بنا سکتا ہے، جو اس کی رفتار، دقت اور مہارت کو ظاہر کرتا ہے۔ فتح ٹو سسٹم میں جدید ایویونکس، نیویگیشن سسٹم اور خصوصی پرواز کی رفتار شامل ہے، جو اسے دفاعی لحاظ سے مزید مؤثر بناتے ہیں۔
اس کے علاوہ، فتح تھری 450 کلومیٹر اور فتح فور 700 کلومیٹر تک مار کرنے کی صلاحیت رکھتے ہیں، جو پاکستان کو خطے میں ایک مضبوط، مؤثر اور ناقابل تسخیر دفاعی حیثیت فراہم کرتے ہیں۔
دفاعی ماہرین کا کہنا ہے کہ فتح راکٹ سسٹم نہ صرف میدان جنگ میں پاکستان کو فیصلہ کن برتری فراہم کرتا ہے بلکہ یہ اس بات کا ثبوت بھی ہے کہ ملک مقامی سطح پر جدید ترین دفاعی ٹیکنالوجی تیار کرنے کی مکمل صلاحیت رکھتا ہے۔
معرکہ بنیان مرصوص میں فتح راکٹ سسٹم کی شمولیت دشمن کے لیے ایک سخت پیغام ہے: پاکستان ہر محاذ پر دفاع کے لیے نہ صرف تیار ہے بلکہ دشمن کو بھرپور، مؤثر اور تباہ کن جواب دینے کی صلاحیت بھی رکھتا ہے۔