بھارت اور بنگلادیش کے درمیان تجارتی محاذ آرائی شدت اختیار کر گئی
نئی دہلی (این این آئی) بھارت اور بنگلادیش نے دو طرفہ تجارتی تعلقات میں کشیدگی کے باعث ایک دوسرے پر نئی تجارتی پابندیاں عائد کر دی ہیں۔
برطانوی نشریاتی ادارے کے مطابق بھارت نے بنگلادیش کے لیے ٹرانزٹ سہولت معطل کر دی ہے، جس کے تحت بنگلادیش اپنی برآمدات بھارتی بندرگاہوں اور ہوائی اڈوں کے ذریعے تیسرے ممالک تک بھیجتا تھا۔ بھارتی حکام نے اس اقدام کی وجہ بندرگاہوں اور ایئرپورٹس پر رش کو قرار دیا ہے۔
جوابی طور پر بنگلادیش نے بھارت سے سڑک کے ذریعے سوتی دھاگے کی درآمد پر پابندی لگا دی ہے، تاکہ مقامی ٹیکسٹائل انڈسٹری کو سستے درآمدی مال سے تحفظ دیا جا سکے۔
تجارتی ماہرین کے مطابق یہ پابندیاں خطے میں اقتصادی تعاون کو متاثر کر سکتی ہیں اور دونوں ممالک کے کاروباری حلقوں کے لیے مشکلات کا باعث بن سکتی ہیں۔