اسلام آباد (نیوز ڈیسک) — تحصیل خال کے علاقے طورمنگ 1 شیکولئی میں پاکستان تحریک انصاف (پی ٹی آئی) کے سوشل میڈیا ایکٹوسٹ اور مقامی رہنما اکبر سید نے اپنے ساتھیوں اور خاندانوں سمیت پاکستان پیپلز پارٹی میں شمولیت کا اعلان کر دیا۔
تفصیلات کے مطابق اکبر سید کے ہمراہ ریحان، فہیم خان، یاسر خان، حنیف اللہ، احمد شاہ، شاہ ولی خان، ذاکر خان، فرد خان، رضوان اور دیگر افراد نے پی ٹی آئی سے علیحدگی اختیار کرتے ہوئے باضابطہ طور پر پیپلز پارٹی میں شمولیت کا فیصلہ کیا۔ اس اہم پیش رفت کا اعلان ایک پروقار تقریب کے دوران کیا گیا، جس میں علاقے کے عمائدین اور کارکنان کی بڑی تعداد نے شرکت کی۔
تقریب سے خطاب کرتے ہوئے اکبر سید نے کہا کہ وہ پاکستان پیپلز پارٹی کے عوامی منشور اور قیادت کے وژن سے متاثر ہو کر پارٹی میں شامل ہو رہے ہیں۔ انہوں نے سابق ایم پی اے محمد زمین خان ایڈووکیٹ پر بھرپور اعتماد کا اظہار کیا اور کہا کہ موجودہ حالات میں پیپلز پارٹی ہی وہ جماعت ہے جو عوامی مسائل کا مؤثر حل پیش کر سکتی ہے۔
اس موقع پر سابق ایم پی اے محمد زمین خان ایڈووکیٹ نے نئے شامل ہونے والوں کو خوش آمدید کہا اور امید ظاہر کی کہ اکبر سید جیسے باشعور افراد کی شمولیت سے پارٹی کی جڑیں مزید مضبوط ہوں گی۔