ڈونلڈ ٹرمپ کا پاکستان کی ذہانت اور تجارتی اہمیت کا اعتراف، پاک بھارت کشیدگی کم کرانے کو اپنی بڑی کامیابی قرار دیدیا
اسلام آباد (نیوز ڈیسک) — امریکہ کے سابق صدر ڈونلڈ ٹرمپ نے ایک حالیہ انٹرویو میں پاکستانی قوم کی ذہانت اور ان کی حیرت انگیز تخلیقی صلاحیتوں کو سراہتے ہوئے کہا ہے کہ پاکستان ایک ایسا ملک ہے جسے نظرانداز کرنا امریکہ کے لیے ممکن نہیں۔ ان کا کہنا تھا کہ پاکستانی عوام انتہائی ذہین ہیں اور دنیا کے لیے شاندار مصنوعات تیار کرنے کی بھرپور صلاحیت رکھتے ہیں۔
انہوں نے تسلیم کیا کہ پاک امریکہ تعلقات مجموعی طور پر خوشگوار رہے ہیں، تاہم تجارتی سطح پر روابط ابھی بھی مطلوبہ معیار تک نہیں پہنچ سکے۔ ٹرمپ نے کہا، "ہم نے پاکستان کے ساتھ بہترین مذاکرات کیے ہیں، اور میں سمجھتا ہوں کہ دونوں ممالک کو باہمی تجارتی تعلقات کو مزید فروغ دینا چاہیے، کیونکہ تالی دونوں ہاتھوں سے بجتی ہے۔"
اپنے انٹرویو میں سابق امریکی صدر نے اس بات پر بھی زور دیا کہ امریکہ پاکستان کے ساتھ وسیع تر تجارتی شراکت داری کا خواہاں ہے، اور اس حوالے سے کئی پہلو زیر غور آ چکے ہیں۔ بھارت کے ساتھ اپنے قریبی تعلقات کا حوالہ دیتے ہوئے انہوں نے کہا کہ پاکستان بھی تجارتی میدان میں پیش رفت کے لیے تیار ہے۔
پاک بھارت کشیدگی کے تناظر میں ٹرمپ نے انکشاف کیا کہ ایک وقت ایسا بھی آیا جب دونوں ایٹمی طاقتیں جنگ کے دہانے پر پہنچ گئی تھیں۔ انہوں نے اس صورتحال کو انتہائی خطرناک اور انسانیت کے لیے تباہ کن قرار دیا، اور کہا کہ ان کی انتظامیہ نے پس پردہ سفارتی رابطوں کے ذریعے فوری مداخلت کر کے حالات کو سنبھالا۔
ٹرمپ کے مطابق، انہوں نے دونوں ممالک کو مذاکرات کی میز پر لانے کی کوشش کی اور خطے میں امن قائم کرنے کے لیے تجارتی تعاون کو مؤثر راستہ قرار دیا۔ ساتھ ہی، انہوں نے بھارت کے تجارتی رویے پر بھی تنقید کی اور کہا کہ بھارت دنیا میں سب سے زیادہ درآمدی محصولات عائد کرنے والا ملک ہے، جس سے عالمی تجارت متاثر ہوتی ہے۔ تاہم، ان کے بقول، بھارت اب امریکی شرائط پر بات چیت کے لیے تیار ہے، اور دونوں ممالک کے درمیان ٹیرف میں نرمی کی راہ کھلتی جا رہی ہے۔
انٹرویو کے اختتام پر ڈونلڈ ٹرمپ نے پاک بھارت کشیدگی کو کم کرانے کو اپنی خارجہ پالیسی کی سب سے بڑی کامیابی قرار دیا۔ ان کا کہنا تھا کہ وہ وعدے نبھانے والے لیڈر ہیں، اور ان کی قیادت میں امریکہ نہ صرف عالمی امن کے لیے کوشاں ہے بلکہ اقتصادی ترقی کے نئے دروازے بھی کھول رہا ہے۔