مچل اسٹارک نے سیکیورٹی خدشات کے باعث آئی پی ایل کے بقیہ میچز کیلئے بھارت واپسی سے انکار کر دیا
سڈنی (این این آئی) آسٹریلیا کے تجربہ کار فاسٹ بولر مچل اسٹارک نے انڈین پریمیئر لیگ (آئی پی ایل) کے باقی میچز میں شرکت سے معذرت کر لی ہے۔ آسٹریلوی میڈیا کے مطابق اسٹارک نے بھارت میں سیکیورٹی خدشات اور خطے میں جاری کشیدگی کو مدنظر رکھتے ہوئے بھارت واپس نہ جانے کا فیصلہ کیا ہے۔
ذرائع کے مطابق مچل اسٹارک نے اپنی فرنچائز دہلی کیپیٹلز کو فیصلے سے باقاعدہ طور پر آگاہ کر دیا ہے اور بقیہ میچز کے لیے اپنی عدم دستیابی کا بتا دیا ہے۔
بتایا جاتا ہے کہ مچل اسٹارک اس میچ کا بھی حصہ تھے جو دھرم شالا میں بلیک آؤٹ کی وجہ سے مؤخر ہوا تھا۔ ان کی اہلیہ، آسٹریلوی ویمن کرکٹر ایلیسا ہیلی بھی اُس وقت وہاں موجود تھیں، جنہوں نے بعدازاں میڈیا سے بات کرتے ہوئے مقام کی صورتحال پر تشویش کا اظہار کیا۔
دوسری جانب آسٹریلوی فاسٹ بولر جوش ہیزل ووڈ کندھے کی تکلیف کے باوجود اپنی ٹیم رائل چیلنجرز بنگلور کو پلے آف مرحلے سے قبل جوائن کرنے کے لیے بھارت روانہ ہو رہے ہیں، جبکہ آسٹریلوی کپتان پیٹ کمنز اور بلے باز ٹریوس ہیڈ بھی اپنی اپنی ٹیموں کے ساتھ دوبارہ شامل ہونے کے لیے بھارت پہنچ چکے ہیں۔
کرکٹ آسٹریلیا جلد ہی اپنے کھلاڑیوں کی آئی پی ایل میں شرکت سے متعلق حتمی پالیسی بیان جاری کرے گا۔ یاد رہے کہ آئی پی ایل کو سیکیورٹی صورتحال کے باعث گزشتہ جمعے کو عارضی طور پر ایک ہفتے کے لیے ملتوی کر دیا گیا تھا اور اب لیگ 17 مئی سے دوبارہ شروع ہونے جا رہی ہے۔