جنگ بندی کے بعد ٹوئٹ، وسیم اکرم پر سوشل میڈیا صارفین برس پڑے

 وسیم اکرم کا تاخیر سے اظہارِ یکجہتی، باسط علی اور سوشل

 میڈیا صارفین برس پڑے

کراچی (این این آئی): سابق کپتان وسیم اکرم کی جانب سے پاک بھارت کشیدگی کے بعد تاخیر سے دیے گئے یکجہتی کے بیان پر سابق کرکٹر باسط علی اور سوشل میڈیا صارفین نے شدید تنقید کی ہے۔

وسیم اکرم نے سماجی رابطے کی ویب سائٹ "ایکس" (سابقہ ٹوئٹر) پر اپنے پیغام میں کہا:

"ہم سب اپنی مسلح افواج کے ساتھ کھڑے ہیں جنہوں نے دشمن کی جارحیت کا منہ توڑ جواب دیا۔ جیسا کہ کہا جاتا ہے، جنگ تب ہوتی ہے جب زبان ناکام ہو جائے۔ سرحد کے دونوں جانب نوجوانوں کے لیے امن اور بات چیت کا راستہ ہی بہتر ہے۔ پاکستان زندہ باد۔"

تاہم یہ ٹوئٹ اس وقت سامنے آیا جب دونوں ممالک کے درمیان جنگ بندی کا باضابطہ اعلان ہو چکا تھا، جس پر انہیں ’تاخیر سے بولنے‘ پر کڑی تنقید کا سامنا کرنا پڑا۔

سابق ٹیسٹ کرکٹر باسط علی نے ردعمل دیتے ہوئے کہا:

"ایسے نازک وقت میں خاموش رہنا اور حالات نارمل ہونے پر بولنا بہادری نہیں۔ کھلاڑیوں کو قوم کے مشکل وقت میں آواز بلند کرنی چاہیے، نہ کہ بعد میں سوشل میڈیا پر بیانات دینے۔"

سوشل میڈیا صارفین نے بھی وسیم اکرم کے رویے کو ’غیر حساس‘ اور ’غیر ذمہ دارانہ‘ قرار دیتے ہوئے کہا کہ جس وقت قوم متحد ہو رہی تھی، اُس وقت ان کی خاموشی نے مایوس کیا۔

دوسری جانب، جنگ بندی کے اعلان کے بعد پاکستان سپر لیگ (پی ایس ایل) کے دسویں ایڈیشن کے باقی میچز کے انعقاد کے امکانات روشن ہو گئے ہیں۔ ذرائع کے مطابق غیرملکی کھلاڑیوں کو عارضی طور پر دبئی میں ہی روکنے کی ہدایت کی گئی ہے، جبکہ پی ایس ایل کے بقیہ آٹھ میچز راولپنڈی میں کروانے پر غور کیا جا رہا ہے۔