اوکاڑہ میں افسوسناک حادثہ: باپ اور تین بچے اسکول جاتے ہوئے جاں بحق
اسلام آباد (نیوز ڈیسک) — پنجاب کے ضلع اوکاڑہ میں ایک دلخراش سڑک حادثے میں ایک باپ اور اس کے تین معصوم بچے جاں بحق ہو گئے۔ افسوسناک واقعہ اس وقت پیش آیا جب والد اپنے بچوں کو موٹرسائیکل پر اسکول چھوڑنے کے لیے روانہ ہوا تھا۔
تفصیلات کے مطابق حادثہ جی ٹی روڈ پر پنجاب کالج کے قریب پیش آیا، جہاں ایک تیز رفتار اور بے قابو ٹریلر نے موٹرسائیکل کو ٹکر مار دی۔ ٹکر اس قدر شدید تھی کہ محمد ندیم اور ان کے تینوں بچے — 10 سالہ آریان، 8 سالہ ایان، اور 6 سالہ بیٹی عائزہ — موقع پر ہی دم توڑ گئے۔
ریسکیو ٹیمیں فوری طور پر جائے حادثہ پر پہنچ گئیں اور لاشوں کو قریبی اسپتال منتقل کیا۔ عینی شاہدین کے مطابق حادثے کی بنیادی وجہ ٹریلر ڈرائیور کی تیز رفتاری اور غفلت تھی۔ واقعے کے فوراً بعد ڈرائیور فرار ہو گیا۔
پولیس نے ٹریلر کو تحویل میں لے کر مقدمہ درج کر لیا ہے اور ڈرائیور کی تلاش جاری ہے۔ پولیس حکام نے متاثرہ خاندان کو انصاف فراہم کرنے کی یقین دہانی کرائی ہے۔ علاقے میں حادثے کے بعد غم اور افسوس کی فضا چھا گئی۔