محکمہ موسمیات نے ملک کے بالائی علاقوں میں مزید بارشوں کی پیشگوئی کر دی ہے۔ ادارے کے مطابق آج رات سے شمالی علاقوں میں مغربی ہواؤں کا طاقتور سسٹم داخل ہوگا، جس کے زیر اثر خیبر پختونخوا، گلگت بلتستان اور کشمیر میں بارشیں متوقع ہیں۔
محکمہ موسمیات نے خبردار کیا ہے کہ ان بارشوں کے نتیجے میں دریائے کابل، سندھ اور جہلم کی ندی نالوں میں پانی کی سطح بلند ہو سکتی ہے، جس سے سیلابی صورتحال پیدا ہونے کا خدشہ ہے۔
ادھر اتوار (24 اپریل) سے کراچی میں دوبارہ گرمی کی لہر شروع ہونے کا امکان ہے، جس دوران درجہ حرارت 39 سے 41 ڈگری سینٹی گریڈ تک پہنچ سکتا ہے۔ سندھ کے دیگر علاقوں میں بھی ہیٹ ویو جیسے حالات بن سکتے ہیں، اس لیے شہریوں کو احتیاط برتنے کی ہدایت کی گئی ہے۔