اسلام آباد (نیوز ڈیسک): پاکستان کی ممکنہ جوابی کارروائی کے پیش نظر بھارت نے 9 مئی تک اپنے 25 ہوائی اڈے بند کر دیے ہیں۔
ذرائع کے مطابق بھارتی افواج نے گزشتہ شب اندھیرے میں آزاد کشمیر کے علاقوں کوٹلی، مظفر آباد، باغ اور پاکستانی شہروں مریدکے اور احمد پور شرقیہ پر حملے کیے، جن میں عام شہریوں کو نشانہ بنایا گیا۔ ان حملوں کے نتیجے میں دو مساجد شہید ہوئیں، جبکہ دو بچوں سمیت 26 افراد شہید اور 46 زخمی ہو گئے۔
پاک فوج نے دشمن کی ان بزدلانہ کارروائیوں کا بھرپور اور مؤثر جواب دیا۔ جوابی کارروائی میں بھارتی فضائیہ کے تین رافیل طیارے، ایک سخوئی، ایک مگ 29 اور ایک ڈرون مار گرایا گیا، جبکہ بھارتی بریگیڈ ہیڈکوارٹر کو بھی شدید نقصان پہنچایا گیا۔
قومی سلامتی کمیٹی نے پاک فوج کو بھارتی اشتعال انگیزی کا منہ توڑ جواب دینے کی مکمل اجازت دے دی ہے۔
بھارتی میڈیا کے مطابق، پاکستان کے ممکنہ ردعمل کے خدشے کے پیش نظر بھارت نے ہنگامی صورتحال کا اعلان کر کے سری نگر، جموں، لیہہ، امرتسر، پٹھان کوٹ، چندی گڑھ، جودھ پور، جیسلمیر، شملہ، دھرمشالہ اور جام نگر سمیت متعدد ہوائی اڈے بند کر دیے ہیں۔
رپورٹس کے مطابق بھارتی ایئرلائنز نے 200 سے زائد پروازیں منسوخ کر دی ہیں، جبکہ کئی فضائی کمپنیوں نے اپنے آپریشنز معطل کر دیے ہیں، جس کے باعث بھارتی ایوی ایشن انڈسٹری کو کروڑوں روپے کا نقصان برداشت کرنا پڑ رہا ہے۔