ترجمان پاک فوج: بھارتی جارحیت کا جواب کب اور کہاں دینا ہے، فیصلہ ہم خود کریں گے

راولپنڈی (این این آئی): ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ بھارت نے پاکستانی قوم کو للکارا ہے، لیکن اس کی غلط فہمی کو جلد دور کر دیا جائے گا۔ بھارتی حملے کے بعد میڈیا کو بریفنگ دیتے ہوئے انہوں نے کہا کہ بھارتی جارحیت کا جواب کب اور کہاں دینا ہے، اس کا فیصلہ ہم خود کریں گے۔

لیفٹیننٹ جنرل احمد شریف چوہدری نے کہا کہ ہمارا دشمن بزدل اور کم ظرف ہے، بھارتی طیارے اس وقت مار گرائے گئے جب انہوں نے پاکستان پر حملہ کیا۔ انہوں نے مزید کہا کہ بھارت نے تنگ نظری کا مظاہرہ کرتے ہوئے پاکستان میں مساجد کو نشانہ بنایا، لیکن پاکستانی قوم کی بھرپور حمایت سے ہماری مسلح افواج نے دشمن کو چند لمحوں میں بھرپور جواب دیا۔

ڈی جی آئی ایس پی آر نے بتایا کہ پاک فوج نے بھارت کے 5 طیارے مار گرائے جن میں 3 رافیل، ایک مگ 29 اور ایک سخوئی طیارہ شامل ہیں، ساتھ ہی 7 ڈرونز بھی تباہ کیے گئے۔

لیفٹیننٹ جنرل احمد شریف چوہدری نے کہا کہ بھارتی حملے کے وقت پاکستانی فضائی حدود میں 57 بین الاقوامی طیارے موجود تھے، جس سے بھارت نے کئی ملکوں کے شہریوں کی زندگیوں کو خطرے میں ڈالا۔ انہوں نے اس بات پر زور دیا کہ بھارت نے نیلم جہلم ہائیڈرو پاور پروجیکٹ کو نقصان پہنچایا، اور ہائیڈرو پروجیکٹ کو نشانہ بنانا ناقابل قبول اور خطرناک ہے۔