تیز آندھی کی تباہ کاری، چھتیں اور دیواریں گرنے سے 3 افراد جاں بحق، 10 زخمی

جہلم میں شدید آندھی اور تیز ہواؤں سے تباہی، 3 افراد جاں بحق، 10 سے زائد زخمی

جہلم (این این آئی) جہلم اور گرد و نواح میں شدید آندھی اور تیز ہواؤں نے شدید تباہی مچادی، مختلف حادثات میں خاتون سمیت کم از کم 3 افراد جاں بحق جبکہ 10 سے زائد افراد زخمی ہو گئے۔

ذرائع کے مطابق گل افشاں کالونی میں ایک نوجوان درخت گرنے سے جاں بحق ہوا، جبکہ ویسٹ کالونی میں مکان کی چھت گرنے کے باعث ایک خاتون زندگی سے ہاتھ دھو بیٹھی۔ ڈھوک وہاب دین کے علاقے میں ایک ہوٹل کی دیوار گرنے سے ویٹر جاں بحق ہوگیا۔

دینہ میں مویشی منڈی کے قریب دیوار گرنے سے 3 افراد زخمی ہوئے جبکہ پنڈدادخان میں مکان کی چھت گرنے سے 4 افراد زخمی ہو گئے۔ تیز آندھی کے باعث مختلف گھروں کی چھتوں پر نصب سولر پلیٹس، ہورڈنگ بورڈز اور دیگر سامان زمین بوس ہوگیا۔

متعدد گاڑیاں اور موٹر سائیکلیں بھی درختوں اور سائن بورڈز گرنے کے باعث متاثر ہوئیں، ریسکیو ٹیمیں امدادی کاموں میں مصروف ہیں اور زخمیوں کو اسپتال منتقل کر دیا گیا ہے۔