پیرس (این این آئی) — فرانسیسی اخبار نے اپنی رپورٹ میں کہا ہے کہ پاکستان میں فوجی آپریشن نے بھارتی فضائیہ کی کمزوریوں کو بے نقاب کر دیا ہے۔ رپورٹ کے مطابق بھارتی لڑاکا طیارے، خاص طور پر رافیل، کا تباہ ہونا بھارتی فضائیہ کے لیے شرمندگی اور دھچکے کا باعث بنا ہے۔
بھارت نے کم از کم تین لڑاکا طیاروں کے نقصان کا اعتراف کیا ہے، جن میں رافیل بھی شامل ہیں۔ بھارتی سکیورٹی ذرائع نے فرانس کی خبر رساں ایجنسی کو ان طیاروں کی تباہی کی تصدیق کی ہے۔
رپورٹ کے مطابق، بھارت نے اپنی فضائیہ کی استعداد بڑھانے کے لیے 2016 میں 36 رافیل طیارے تقریباً 8 ارب یورو کی لاگت سے خریدے تھے۔ فرانسیسی اخبار کا کہنا تھا کہ پاکستانی فضائیہ کے پاس 15 سال کے انسداد دہشت گردی آپریشنز کے تجربے کی وجہ سے جنگی آپریشنز میں بھارت کے مقابلے میں زیادہ مہارت ہے۔ پاکستان کے پاس جدید فرانسیسی اور چینی ساختہ لڑاکا طیارے بھی موجود ہیں جو بھارت کے خلاف مؤثر ہیں۔
اخبار نے یہ بھی انکشاف کیا کہ بھارت نے میڈیا کو لڑاکا طیاروں کی تباہی کی خبر ہٹانے پر مجبور کیا تھا۔