اسلام آباد (نیوز رپورٹ): وزیراعظم کے مشیر رانا ثناء اللہ کے حالیہ بیان پر تحریک انصاف نے شدید ردعمل دیتے ہوئے کہا ہے کہ شہداء کے خون کا بدلہ نہ لینے کا اعلان قومی وقار کے خلاف ہے۔
تحریک انصاف کی جانب سے جاری کردہ بیان میں کہا گیا ہے کہ بھارتی جارحیت کے نتیجے میں شہری آبادی اور مساجد کو نشانہ بنایا گیا، جس سے درجنوں پاکستانی شہید ہوئے، لیکن حکومت کا رویہ انتہائی مایوس کن اور غیر ذمہ دارانہ ہے۔ پی ٹی آئی کے مطابق رانا ثناء اللہ کا بیان نہ صرف کمزوری ظاہر کرتا ہے بلکہ اس سے دشمن کو غلط پیغام گیا ہے کہ پاکستان اپنے دفاع میں کمزور پڑ گیا ہے۔
تحریک انصاف نے الزام عائد کیا کہ حکمران جماعت اور شریف خاندان نے بھارتی وزیر اعظم نریندر مودی کا نام لینے سے گریز کر کے اپنی بے حسی اور ذاتی مفادات کو قومی سلامتی پر ترجیح دی ہے۔ بیان میں کہا گیا کہ موجودہ حکومت قومی غیرت، عزت اور خودمختاری کو مفاہمت اور مصلحت کی نذر کر رہی ہے۔
تحریک انصاف نے اس موقع پر عمران خان کی قیادت کو یاد کرتے ہوئے کہا کہ ملک کو ایسے نڈر اور بااصول رہنما کی ضرورت ہے جو قوم کے وقار، خودمختاری اور دفاع کے لیے واضح اور دوٹوک مؤقف اپنائے۔
واضح رہے کہ وزیراعظم کے مشیر برائے سیاسی امور رانا ثناء اللہ نے گزشتہ روز میڈیا سے گفتگو کرتے ہوئے کہا تھا کہ پاکستان نے بھارتی حملے کا بھرپور جواب دیا ہے، اور اگر بھارت مزید کوئی اقدام نہیں کرتا تو پاکستان بھی کسی نئی کارروائی کا ارادہ نہیں رکھتا۔ انہوں نے یہ بھی کہا کہ پاکستان ایک ذمہ دار ریاست کے طور پر بین الاقوامی قوانین کے تحت صرف دفاعی اقدامات اٹھا رہا ہے اور کسی بھی واقعے کی شفاف تحقیقات کے لیے ہر عالمی فورم پر خود کو پیش کرنے کے لیے تیار ہے۔