اسلام آباد (نیوز ڈیسک): وزیر دفاع خواجہ آصف نے بھارت کو سخت وارننگ دیتے ہوئے کہا ہے کہ اگر نئی دہلی نے جنگ کے دائرہ کار کو وسیع کرنے کی کوشش کی تو خطہ ایٹمی تصادم کی لپیٹ میں آ سکتا ہے۔
جیونیوز سے گفتگو کرتے ہوئے خواجہ آصف نے دوٹوک مؤقف اپناتے ہوئے کہا کہ اگر خطے میں ایٹمی جنگ چھڑتی ہے تو اس کی مکمل ذمہ داری بھارت پر عائد ہوگی۔ انہوں نے کہا کہ پاکستان ایک ذمہ دار ایٹمی قوت ہے، مگر اپنی سالمیت اور خودمختاری کے دفاع کے لیے ہر آپشن کھلا رکھتا ہے۔
خیال رہے کہ گزشتہ شب بھارتی فورسز نے رات کی تاریکی کا فائدہ اٹھاتے ہوئے آزاد کشمیر اور پاکستان کے مختلف علاقوں پر حملے کیے، جن میں شہری آبادی اور مساجد کو نشانہ بنایا گیا۔ ان حملوں کے جواب میں پاکستانی افواج نے زبردست جوابی کارروائی کرتے ہوئے بھارتی فضائیہ کے پانچ جنگی طیارے مار گرائے اور ایک اہم بریگیڈ ہیڈ کوارٹر کو بھی نشانہ بنایا۔ ڈی جی آئی ایس پی آر کی جانب سے دشمن کی چیک پوسٹوں کی تباہی کی ویڈیوز بھی میڈیا کو فراہم کی گئی ہیں۔
آج منعقدہ قومی سلامتی کمیٹی کے اہم اجلاس میں پاک فوج کو دشمن کی کسی بھی جارحیت کا مؤثر اور سخت جواب دینے کا مکمل اختیار دے دیا گیا ہے۔
سرکاری اعلامیے کے مطابق، پاکستان اقوام متحدہ کے چارٹر کے آرٹیکل 51 کے تحت اپنی سرزمین، عوام اور خودمختاری کے دفاع کا حق رکھتا ہے، اور وہ کسی بھی وقت، کسی بھی مقام اور کسی بھی طریقے سے بھارتی حملے کا جواب دینے میں آزاد ہے۔
اعلامیہ میں مزید کہا گیا ہے کہ پاکستان امن کا خواہاں ضرور ہے، لیکن قومی وقار، علاقائی خودمختاری اور شہریوں کے تحفظ پر کوئی سمجھوتہ نہیں کیا جائے گا۔