نازیبا سلوک پر مس انگلینڈ، بھارت میں ہونے والا ’مس ورلڈ مقابلہ‘ ادھورا چھوڑ کر وطن واپس روانہ

 مس انگلینڈ کا احتجاج: نازیبا سلوک پر 'مس ورلڈ 2025' مقابلہ ادھورا چھوڑ دیا

حیدرآباد (این این آئی) — بھارتی شہر حیدرآباد میں ہونے والے مس ورلڈ 2025 مقابلے میں برطانیہ کی نمائندگی کرنے والی 24 سالہ میلا میگی نے نازیبا سلوک کے باعث مقابلے سے دستبرداری کا اعلان کر دیا۔

برطانوی اخبار دی سن سے گفتگو کرتے ہوئے میلا میگی نے انکشاف کیا کہ بھارت میں انہیں ایسے پیش کیا جا رہا تھا جیسے وہ کوئی طوائف ہوں۔ ان کا کہنا تھا، "میں مثبت تبدیلی کا پیغام لے کر آئی تھی، مگر ہمیں اس انداز میں پیش کیا گیا جیسے ہم کرتب دکھانے والے بندر ہوں، اور میں اخلاقی طور پر ایسے ماحول کا حصہ نہیں بن سکتی تھی۔"

انہوں نے کہا کہ اگر آپ اپنی آواز استعمال نہ کریں اور دنیا میں کوئی فرق نہ ڈالیں تو تمام اعزازات اور کرسیاں بے معنی ہو جاتے ہیں۔

میلا نے بتایا کہ مقابلے کے دوران وہ متعدد بار بے چینی اور اضطراب کا شکار ہوئیں، خاص طور پر شام کی تقریبات میں، جہاں ان سے توقع کی جاتی کہ وہ اسپانسرز اور مہمانوں کو تفریح فراہم کریں گی۔ ان کا کہنا تھا، "ہر میز پر چھ مہمان ہوتے اور دو لڑکیوں کو ان کے ساتھ بٹھایا جاتا، ہمیں پورا وقت ان کے ساتھ گزار کر انہیں خوش کرنا ہوتا، جو میرے لیے ناقابل قبول تھا۔"

انہوں نے مزید کہا، "میں یہاں کسی کی دلجوئی یا تفریح کے لیے نہیں آئی تھی۔ جب میں نے ان مسائل پر بات کرنے کی کوشش کی، جن کے لیے میں کھڑی ہوئی تھی، تو وہاں موجود کچھ مردوں نے کوئی توجہ نہیں دی۔"

میلا میگی نے صاف الفاظ میں کہا، "بھارت میں مجھے اس طرح پیش کیا گیا جیسے میں کوئی طوائف ہوں۔ میں نے کبھی سوچا بھی نہیں تھا کہ مجھے ایسی صورتِ حال کا سامنا کرنا پڑے گا۔"

برطانیہ کی جانب سے میلا کو ایک مضبوط امیدوار سمجھا جا رہا تھا، تاہم ان کی دستبرداری کے بعد اب شارلٹ گرانٹ برطانیہ کی نمائندگی کریں گی۔ مس ورلڈ کا فائنل اگلے ہفتے 180 سے زائد ممالک میں براہِ راست نشر کیا جائے گا۔