دبئی میں دنیا کا سب سے بڑا ویزا ایپلیکیشن سینٹر فعال
دبئی (این این آئی) دبئی کے وافی سٹی میں وی ایف ایس گلوبل نے دنیا کے سب سے بڑے ویزا ایپلیکیشن سینٹر کا باضابطہ افتتاح کر دیا ہے، جو 200 سے زائد قومیتوں کو ویزا خدمات فراہم کرے گا۔
افتتاحی تقریب میں دبئی کے محکمہ اقتصادیات و سیاحت کے ڈائریکٹر جنرل ہلال سعید المری، جنرل ڈائریکٹوریٹ آف آئیڈنٹیٹی اینڈ فارنرز افیئرز دبئی کے ڈائریکٹر جنرل محمد احمد المری، اور وی ایف ایس گلوبل گروپ کے بانی و سی ای او زوبن کارکاریا نے شرکت کی۔
ہلال سعید المری نے اس موقع پر کہا کہ یہ مرکز صرف ایک انفراسٹرکچر کی کامیابی نہیں بلکہ دبئی کی اس حکمت عملی کی علامت ہے جس کے تحت عالمی نقل و حرکت کو آسان بنایا جا رہا ہے، مواقع پیدا کیے جا رہے ہیں اور سیاحت و کاروبار کو فروغ دیا جا رہا ہے۔
انہوں نے مزید کہا کہ دبئی اکنامک ایجنڈا "ڈی-33" کے اہداف کی تکمیل کے لیے عالمی رسائی کو ہموار بنانا ہماری اولین ترجیح ہے۔ ویزا سہولیات بین الاقوامی ٹیلنٹ، سیاحتی ترقی اور عالمی شراکت داریوں کے فروغ میں کلیدی کردار ادا کر رہی ہیں، جو دبئی کو مستقبل کا عالمی مرکز بنانے کی راہ ہموار کرتی ہیں۔