زرمبادلہ کے ذخائر میں نمایاں اضافہ، آئی ایم ایف کی قسط آئندہ ہفتے شامل ہو گی
کراچی (این این آئی) اسٹیٹ بینک آف پاکستان نے اعلان کیا ہے کہ ملک کے زرمبادلہ کے سرکاری ذخائر میں گزشتہ ہفتے کے دوران نمایاں اضافہ ریکارڈ کیا گیا ہے، جبکہ عالمی مالیاتی ادارے (آئی ایم ایف) سے موصول ہونے والی قرض کی قسط آئندہ ہفتے کے اعداد و شمار میں شامل کی جائے گی۔
مرکزی بینک کے جاری کردہ اعداد و شمار کے مطابق، 9 مئی 2025 تک زرمبادلہ کے سرکاری ذخائر میں 7 کروڑ 10 لاکھ ڈالر کا اضافہ ہوا، جس کے بعد ذخائر کی مجموعی مالیت 10 ارب 40 کروڑ 31 لاکھ ڈالر تک پہنچ گئی ہے۔
اسٹیٹ بینک کے مطابق، 9 مئی تک ملک کے مجموعی زرمبادلہ ذخائر 15 ارب 61 کروڑ 31 لاکھ ڈالر ریکارڈ کیے گئے، جن میں سے کمرشل بینکوں کے پاس 5 ارب 21 کروڑ 7 لاکھ ڈالر کے ذخائر موجود ہیں۔
مرکزی بینک نے وضاحت کی ہے کہ آئی ایم ایف کی جانب سے دی جانے والی ایک ارب 2 کروڑ 30 لاکھ ڈالر کی قسط آئندہ ہفتے یعنی 16 مئی کو جاری ہونے والے اعداد و شمار میں شامل کی جائے گی، جس سے ذخائر میں مزید اضافہ متوقع ہے۔
ماہرین کا کہنا ہے کہ یہ اضافہ ملکی مالی استحکام کی جانب ایک اہم قدم ہے، تاہم مستقل بہتری کے لیے برآمدات میں اضافہ اور مالیاتی نظم و ضبط ناگزیر ہے۔