جان سینا کو دو بار جلدی کینسر کیوں ہوا؟ ایک عام مگر خطرناک غلطی کا انکشاف
اسلام آباد (نیوز ڈیسک) — معروف ریسلر اور ہالی ووڈ اداکار جان سینا نے انکشاف کیا ہے کہ وہ اپنی زندگی میں دو بار جلد کے کینسر کا شکار ہو چکے ہیں، اور اس کی بنیادی وجہ ایک عام مگر سنگین لاپرواہی تھی: سورج سے بچاؤ کے لیے سن اسکرین کا استعمال نہ کرنا۔
48 سالہ جان سینا، جو 17 بار ڈبلیو ڈبلیو ای چیمپیئن کا اعزاز حاصل کر چکے ہیں، نے حالیہ انٹرویو میں بتایا کہ وہ ماضی میں سن اسکرین لگانے کو غیر ضروری سمجھتے تھے۔ لیکن جب انہیں دو بار جلدی کینسر کی تشخیص ہوئی، تو یہ رویہ ان کی زندگی میں ایک خطرناک موڑ بن گیا۔
ان کا کہنا تھا کہ پہلی بار سینے پر ایک مشکوک نشان کے معائنے سے بیماری کا انکشاف ہوا، اور ایک سال بعد کمر پر بھی ایسا ہی ایک کینسر زدہ نشان پایا گیا۔ دونوں بار ٹیسٹ کے نتائج نے کینسر کی تصدیق کی، جس کے بعد ان کا مکمل علاج کیا گیا۔
جان سینا نے کہا، "مجھے دونوں بار ڈاکٹروں نے فون کر کے بتایا کہ ٹیسٹ رپورٹس میں کینسر کی علامات پائی گئی ہیں۔ یہ میرے لیے ایک تنبیہ تھی کہ اپنی صحت کو معمولی نہ سمجھوں۔"
اب وہ نہ صرف خود سن اسکرین کا باقاعدہ استعمال کرتے ہیں بلکہ مردوں کو بھی اس حوالے سے سنجیدگی اختیار کرنے کا مشورہ دیتے ہیں۔ ان کا کہنا ہے کہ اکثر مرد جِلدی نگہداشت کو غیر ضروری سمجھتے ہیں، جو کہ ایک خطرناک غفلت ہے۔
ماہرینِ صحت بھی اس بات سے متفق ہیں کہ جلد کے کینسر کی بڑی وجہ سورج کی شعاعوں سے خارج ہونے والی الٹرا وائلٹ (UV) ریز ہیں، جو جلد کے خلیات کو نقصان پہنچاتی ہیں۔ سن اسکرین ان شعاعوں سے بچاؤ فراہم کرتی ہے، لیکن اکثر لوگ اسے معمولی سمجھ کر نظر انداز کر دیتے ہیں۔
ماہرین تجویز کرتے ہیں کہ سن اسکرین صرف چہرے پر ہی نہیں بلکہ گردن، کان، ہاتھ اور دیگر کھلے جسمانی حصوں پر بھی باقاعدگی سے لگائی جائے، اور جلد پر کسی بھی غیر معمولی تبدیلی کو سنجیدگی سے لیا جائے۔
جان سینا کی کہانی ہمیں یاد دلاتی ہے کہ جلدی کینسر صرف دوسروں کو نہیں، بلکہ کسی کو بھی لاحق ہو سکتا ہے، مگر بروقت احتیاطی تدابیر سے اس سے بچا جا سکتا ہے۔