اسلام آباد (این این آئی) – آپریشن بنیان مرصوص کے دوران پاک فضائیہ نے بھارتی فضائیہ کو شدید نقصان پہنچایا، اور بھارتی لڑاکا طیارے مختلف علاقوں میں گر کر تباہ ہوئے۔ سیکیورٹی ذرائع کے مطابق بھارتی طیاروں کے پائلٹس زخمی یا لاپتا ہو گئے۔
تفصیلات کے مطابق، ایک بھارتی طیارہ اننت ناگ میں گر کر تباہ ہوا، جس میں بھارتی پائلٹ کی ہلاکت کا خدشہ ظاہر کیا جا رہا ہے۔ اسی طرح، بھارتی فضائیہ کا دوسرا طیارہ پلوامہ میں گرا، جہاں دونوں پائلٹس شدید زخمی ہوئے اور انہیں سری نگر ہسپتال منتقل کیا گیا۔ ایک اور بھارتی طیارہ اکھنور میں گر کر تباہ ہوا، جس کے دونوں پائلٹس کو ہسپتال منتقل کیا گیا۔ بھارتی فضائیہ کا چوتھا طیارہ ضلع رام بن میں گر کر تباہ ہوا، اور طیارے کے پائلٹ اقبال سنگھ کو آرمی ہسپتال ادھم پور منتقل کیا گیا۔
سیکیورٹی ذرائع کے مطابق بھارتی فضائیہ کا پانچواں طیارہ بھٹنڈہ کے علاقے میں گر کر تباہ ہوا، جبکہ بھارتی ہیرون ریموٹ پائلٹڈ وہیکل جموں کے مشرق میں 13 ناٹیکل میل دور گری۔ دفاعی ماہرین کا کہنا ہے کہ یہ تباہی بھارتی فضائیہ کے لیے ایک شدید دھچکا ثابت ہوئی اور آپریشن بنیان مرصوص بھارتی فضائیہ کی مکمل ناکامی کو ظاہر کرتا ہے۔
یاد رہے کہ 7 مئی کو پاکستان کی مسلح افواج نے بھارت کے بزدلانہ حملے کا منہ توڑ جواب دیتے ہوئے بھارتی فضائیہ کے تین رافیل طیاروں سمیت پانچ جنگی طیارے مار گرائے تھے۔ اس دوران ایک بریگیڈ ہیڈکوارٹر، چھ مہار بٹالین ہیڈکوارٹرز اور مختلف چیک پوسٹیں بھی تباہ کی گئیں۔ بھارت نے ایل اوسی کے چار سیکٹرز میں اپنی پوسٹوں پر سفید جھنڈے لہرا کر شکست تسلیم کر لی تھی۔
وزیر اطلاعات عطااللہ تارڑ نے رات 2:45 پر دو بھارتی طیاروں کو مار گرائے جانے کی تصدیق کی، جبکہ تیسرے بھارتی طیارے کو صبح 3:42 پر پی ٹی وی کے ذریعے مار گرائے جانے کی تصدیق کی۔ اس کے بعد، فوجی ترجمان نے صبح 4 بجے کے قریب صورتحال کے تازہ ترین اعداد و شمار فراہم کیے اور چوتھے اور پانچویں طیارے کی تصدیق صبح 5 بجے کے بعد کی۔