اسلام آباد (این این آئی) — پاکستان اور چین کے درمیان بڑھتا ہوا دفاعی تعاون عملی جنگی برتری میں تبدیل ہو چکا ہے، جس کا مظاہرہ حالیہ پاک بھارت کشیدگی کے دوران واضح طور پر دیکھنے میں آیا۔ عالمی ذرائع ابلاغ نے تسلیم کیا ہے کہ چین کے تیار کردہ J-10C جنگی طیاروں اور PL-15 میزائلوں نے بھارتی فضائیہ کے کئی طیارے مار گرائے، جس سے چینی ٹیکنالوجی اور پاکستانی عسکری مہارت کی برتری ثابت ہو گئی۔
برطانیہ، فرانس اور امریکا کے ممتاز میڈیا اداروں نے اپنی رپورٹس میں پاکستان کی عسکری حکمت عملی اور چینی دفاعی ٹیکنالوجی کی کارکردگی کو سراہا۔ معروف جریدے دی اکانومسٹ کے مطابق، چین کے فراہم کردہ ہتھیاروں نے پاکستان کے لیے پہلی بڑی جنگی آزمائش "کامیابی سے" مکمل کی۔
رپورٹس میں بتایا گیا کہ اربوں ڈالرز کی لاگت سے حاصل کردہ بھارتی رافیل طیارے میدان جنگ میں چینی ٹیکنالوجی کے سامنے بے اثر ثابت ہوئے۔ دفاعی ماہرین کا کہنا ہے کہ چین سے حاصل کردہ ایئر ڈیفنس سسٹمز، ڈرونز، اور ہائپر سونک میزائلز نے پاکستان کو خطے میں نمایاں تکنیکی برتری دلائی ہے۔
علاوہ ازیں، چینی تعاون سے تیار کردہ JF-17 تھنڈر طیاروں کو بھی عالمی سطح پر پذیرائی مل رہی ہے، جو اس دفاعی شراکت داری کی کامیابی کا ایک اور ثبوت ہے۔