آئندہ بجٹ میں سرکاری ملازمین کیلئے خوشخبری، تنخواہوں میں اضافے پر غور
اسلام آباد (نیوز ڈیسک): مالی سال 2025-26 کے بجٹ کی تیاریاں جاری ہیں اور حکومت نے 2 جون کو بجٹ پیش کرنے کا عندیہ دیا ہے۔ اس حوالے سے موصولہ اطلاعات کے مطابق، وفاقی حکومت سرکاری ملازمین کو مالی ریلیف دینے کے لیے مختلف تجاویز پر غور کر رہی ہے۔
ذرائع کے مطابق، گریڈ 1 سے 16 کے سرکاری ملازمین کی تنخواہوں میں 25 فیصد تک اضافے کی تجویز زیر غور ہے، جبکہ گریڈ 17 سے 22 کے افسران کے لیے 20 فیصد اضافے کا امکان ظاہر کیا جا رہا ہے۔ اس کے ساتھ ساتھ تنخواہ دار طبقے کے لیے انکم ٹیکس سلیبس میں 10 فیصد تک رعایت دیے جانے پر بھی غور ہو رہا ہے، جس سے تقریباً 50 ارب روپے کا ریلیف مل سکتا ہے۔
تاہم، ان تجاویز کو حتمی شکل آئی ایم ایف سے 14 مئی سے 22 مئی تک جاری رہنے والے مذاکرات کے بعد دی جائے گی۔
واضح رہے کہ گزشتہ مالی سال کے بجٹ میں بھی حکومت نے گریڈ 1 تا 16 کے ملازمین کی تنخواہوں میں 25 فیصد اور گریڈ 17 تا 22 کے افسران کے لیے 20 فیصد اضافہ کیا تھا، جبکہ پنشنرز کو 15 فیصد ریلیف اور کم از کم ماہانہ اجرت کو 32 ہزار سے بڑھا کر 37 ہزار روپے کر دیا گیا تھا۔