فضا علی کو بیٹی کے جذباتی ردعمل پر تنقید، بھارتی فلم دکھانا مہنگا پڑ گیا
لاہور (این این آئی) — معروف اداکارہ، گلوکارہ اور میزبان فضا علی اپنی بیٹی فرال کے ساتھ اپنی زندگی کے لمحات اکثر سوشل میڈیا پر شیئر کرتی رہتی ہیں۔ فرال چونکہ بچپن سے ہی عوام کی نظروں میں پلی بڑھی ہے، اس لیے وہ کیمرے کے سامنے پراعتماد انداز میں بات کرنا بخوبی جانتی ہے۔
حال ہی میں فضا علی نے انسٹاگرام پر ایک ویڈیو شیئر کی، جس میں وہ اور ان کی بیٹی بالی ووڈ فلم "اگنی پتھ" دیکھ رہے تھے۔ ویڈیو میں دکھایا گیا کہ فلم کے ایک جذباتی منظر کے دوران فرال شدتِ جذبات سے رونے لگی۔ فضا نے ویڈیو کے کیپشن میں لکھا کہ ان کی بیٹی فطرتاً بہت حساس ہے اور یہ اس کا اصل مزاج ہے، محض کیمرے کے لیے اداکاری نہیں۔
تاہم یہ ویڈیو سوشل میڈیا پر وائرل ہونے کے بعد فضا علی کو سخت تنقید کا سامنا کرنا پڑا۔ کئی صارفین نے سوال اٹھایا کہ پاکستانی فنکار بھارتی فلمیں کیوں دیکھتے ہیں، جب کہ بھارت کی جانب سے پاکستانی عوام کے خلاف سخت رویے اور مظالم کی خبریں سامنے آتی رہتی ہیں۔
ایک صارف نے تبصرہ کیا: "آپ کو بھارتی فلموں کا بائیکاٹ کرنا چاہیے تھا۔" ایک اور نے لکھا: "کیا آپ کو اندازہ ہے کہ بچوں کو کس قسم کا مواد دکھا رہی ہیں؟" کچھ لوگوں نے فضا کو یاد دلایا کہ بھارتی فنکار کبھی پاکستانی مواد کو اتنی اہمیت نہیں دیتے، پھر پاکستانی فنکار ایسا کیوں کر رہے ہیں؟
کئی صارفین کا کہنا تھا کہ فضا علی جیسے عوامی شخصیات کو جذبات کے اظہار کے ساتھ ساتھ معاشرتی حساسیت کا بھی خیال رکھنا چاہیے، کیونکہ ان کے عمل کا اثر وسیع سطح پر ہوتا ہے۔
اگرچہ کچھ مداحوں نے فرال کی حساسیت کو فطری اور قابلِ تعریف قرار دیا، لیکن مجموعی طور پر اس واقعے نے ایک نئی بحث کو جنم دے دیا کہ فنکاروں کو اپنے پلیٹ فارم پر کیا شیئر کرنا چاہیے اور کیا نہیں۔