ملک بھر کے بجلی صارفین کے لیے خوشخبری، بنیادی ٹیرف میں کمی کا امکان
کراچی (این این آئی) — کے الیکٹرک سمیت ملک بھر کے بجلی صارفین کے لیے بڑی خوشخبری سامنے آئی ہے، بجلی کے بنیادی ٹیرف میں واضح کمی کا امکان ظاہر کیا جا رہا ہے۔ مختلف کیٹیگریز میں فی یونٹ 78 پیسے سے لے کر 2 روپے 25 پیسے تک کمی کی تجویز دی گئی ہے۔
ذرائع کے مطابق مالی سال 2025-26 کے دوران بجلی صارفین کو مجموعی طور پر 140 ارب سے 400 ارب روپے تک ریلیف دیے جانے کا تخمینہ لگایا گیا ہے۔ سنٹرل پاور پرچیزنگ ایجنسی (سی پی پی اے) نے بجلی تقسیم کار کمپنیوں کی جانب سے نیشنل الیکٹرک پاور ریگولیٹری اتھارٹی (نیپرا) کو اس حوالے سے باضابطہ درخواست جمع کرا دی ہے۔
درخواست میں آئندہ مالی سال کے لیے پاور پرچیز پرائس (PPP) کا تخمینہ 24.75 سے 26.22 روپے فی یونٹ لگایا گیا ہے، جو اس وقت 27 روپے فی یونٹ ہے۔ نیپرا 15 مئی کو اس درخواست پر سماعت کرے گا، جس کے بعد حتمی فیصلہ متوقع ہے۔
اگر نیپرا اس کمی کی منظوری دیتا ہے تو یہ فیصلہ بجلی کے بوجھ تلے دبے عوام کے لیے مہنگائی کے اس دور میں ایک بڑی راحت کا باعث بنے گا۔